Toanielselskip Sint Nyk kiest dit seizoen foar it stik ,,Chez Dolly Encore’’. Yn in reeks foarstellings yn Zalencentrum Sint Nyk nimt it selskip it publyk mei nei in nachtklup fol glitter, glamour en gedoch. De kaartferkeap start op moandei 29 desimber 2025.
It ferhaal spilet him ôf yn nachtklup Chez Dolly, ferneamd nei de eigneresse Dolly. Tegearre mei har artysten docht se der alles oan om de gasten in ûnferjitlike jûn te besoargjen. De praktyk falt lykwols gauris wat minder glamoureus út: de klup sit yn swier waar, de artysten binne net altyd fan it heechste nivo en efter de skermen bart fan alles. Dat soarget foar in moaie miks fan komyske en minder komyske situaasjes – werkenber, eigentiids en foar it publyk fan begjin oant ein boeiend.
De spilers fan Toanielselskip Sint Nyk binne sûnt septimber drok oan it repetearjen om alle rollen en sênes skerpsnijd op it poadium te krijen. Mei ,,Chez Dolly Encore’’ hopet it selskip dat it publyk ek dit jier wer massaal de gong nei Zalencentrum Sint Nyk fine sil.
De jierlikse foarstellings binne yn 2026 op freed 30 jannewaris 2026, sneon 31 jannewaris 2026, freed 6 febrewaris 2026, sneon 7 febrewaris 2026, freed 13 febrewaris 2026 en sneon 14 febrewaris 2026. Alle jûnen begjinne om 19.30 oere, de seal fan Zalencentrum Sint Nyk giet om 19.00 oere iepen.
Illustraasje: Toanielselskip Sint Nyk
